هوان ... للشاعر المتألق خالد موسى

هوان

ياباياعين الهوى سوق الضمير قفلوه

أصل اللي باع ذمته لقا ناس كتير حيوه

وكمان قليل الشرف كل العراه حبوه

عايشين معاه الترف وبعريهم غطوه

سوق النداله فتح وبن الحرام أسووه

بايع وباع جتته وأمه كمان وأبوه

بيدوس بقوه وغشم ع اللي في يوم ستروه

والدنيا متذوقه وتوب الجمال غشوه

ياماشي وف سكتك اللي مشيها هان

شيطان في توب الوفا بيزفه ألف شيطان

يازارع الشيطنه وباني بيها كيان

هيجي يوم تنكشف ويكون أوانك حان

وتلاقي إن التمن إن اللي خان يتخان

وضريبة المعصيه إنك تعيش ندمان

يا نفسي مالك كده زعلانه ع الواطيين

بصه بحسره وقلق ع اللي مش حاسين

هاينين على نفسهم وبطبعهم خاينين

خاين لخاين يقوله هو إحنا خنا مين

أصل الخيانه ترف للي مش داريين

واللي يعيش القرف يشوف الفسيخ ياسمين

وأهل الفصيله العويله جوه الحرام دايبين

شافوا إن الدوا في عيشة التايهين

تايهين في بحر إنطوي على ناس كتير فاسدين

فيه بياعين الهوى بيزينوها بطين