ياخاي حبُّو معشَّشْ فيني/بقلم الاستاذ الشاعر/محمد حميدي

ياخاي حبُّو معَشِّشْ فيني

-------------------------------

يقولو إشْ مايقولو حبُّو معَشِّشْ فيني 

فيُّو خلِقتْ وأول سما شافتا عيني

فيُّو أول نسمة هوا شمِّيتا

آه من هواه بلسم يشفيني

فيُّو سمِعتْ أول خفقة قلب من قلب أمي

و أحلا نغم لمَّا تقللي يللا نام ياعيني

تسهر وأنا نييم بِل جنِّة  مرتاح البال

وتنام ع هَدَسْ خايفه لشي يزعجني أو يِئزيني

أوَّل خطوة كانت ع ترابو لك أبوس ترابو

ياما حطِّيت عليه جبيني

ياما رِحتْ ع طولي فوقو وأنا مبسوط

أنفِّض غراضي وأركود وأمِّي تلاقيني

وياما ع ترابو سَجدِتْ للمولى 

أشكيلو همِّي وقسوة سنيني

فيُّو رفقاتي وحارتي ومدرستي

وحبابي وأهلي وجيراني

ياما سهرنا سوا وغنِّينا يارايحين ع حلب

حبي وقلبي وروحي معكن راحو وأنيني

لك يقولو إش مايقولو حبُّو مافارقني يُوم

وماشافت متلو عيوني

لا تلوموني إزا طلِعتْ غَصْبِن عنّي

كل يوم عبيحرقني أنيني

لا تلومني

شوفو إش ساوا فيني حنيني

لا تلوموني لأنو شغلي لمَّا راح  وانسرق بيتي

وجروحي كبرت ما في مين يداويني

إزا بِدَّك خبز أو بِدَّك مَيْ وين المصاري 

لك حتى الدوا احتكروا ما كانوا ريحميني

وين ما رِحتْ عَبْطَلْعُو علي بنظرة كِبر

لك ياعالم أنا بشر .. إلي الله بيكفيني

وين أروح لا بيت ولا شغل وفوقا قهر

لك حتى بوطني لاجئ سمُّوني

طلِعتْ غَصْبِن عنِّي وطِلْعِتْ قبل ما أطلع روحي

بقلبي نِقيش صورتو وحبُّو بشراييني

لك أنا ما طعلِتْ لأنِّي بحب الغربة والله يشهد عَلَي

الغربة كربة وفيّا انحَرْقِتْ من عمري سنيني

لك الغربة أكلِت صحابي وأهلي وحبابي 

اندفنو وما شافتن عِيني

منُّن تحت التراب والتراب عليهن غريب

ومنُّن السمك أكلُن وصارو زكرى لشوقي وحنيني

ومنُّن ما بَعْرِف وين صارو 

بس قلبي ما بنساهم ولو طالِت سنيني

هيك الله خلقني بَحِب الوطن

هيك أخلاقي وهيك ديني

وهلَّق واليوم وبكرا والله ما بنساه

لك أنا حلبي سوري ورِيفع لسَّما جبيني

لك أش ماصار حرب ودمار وتعتير وفيروس

إلا مايجي يوم وتضحك سننيني

إلا ما يفرجا رب السَّما

وأمسح دموع عيني

وأشوف الظلم من وطني ولَّى

وربِّي يستجيب ويرضي المظلوم ويرضيني

وأرجع و تلفني أمّي وع كتفا أنسى الهموم

وأرجع عترابو أسجد وأحط جبيني

يارب مالي غِيرك إنت بحالي عليم

شافِ جروح الوطن وأهلو وشافيني

ما بَحسِن إلَّا أدعي للوطن وأهلو

والله ياخاي حبُّو مَعشِّشْ ِفيني

محمد حميدي

تمتمات حلبية

(باللهجة العامية الحلبية)