حته من الجنه/بقلم /الاستاذ الشاعر/أحمد محمود حفني

حته من الجنه 

رضاكي كل ما أتمنى

يا شيلا حمل على حملك 

انا اللي ف كعبك اتحنى 

وبوس رأسك وبوس رجلك 

فوق الحمل شيلا حمول 

ودعاها ل رب الكون 

لابتشكي ولا بتقول  

وتعبها فى عينيها سكون 

بتدادي وبتعلم وبتربي 

وتهدي فرحها ل قلبي 

أملها تشوفني متهني

وتركه الحمل على ربي 

بتدعي لي فى كل صلاه 

يبعد عن خطايا الشر 

ولو حسيت بقولة اه 

يتغير وشها ويصفر

كأن الجرح جواها 

بينزف م الوريد الدم 

تداويني بدعاها 

الاقي الجرح فجأه إتلم 

لو شافت في عيني الفرح 

اشوف الضحكه فى عينيها 

بتقولي يدوم السعد 

وكلمه واحده ترضيها 

دايما شيلا هم الكل 

وتنسى نفسها أوقات 

فى منامنا علينا تطل

وتسهر ليل تعد سعات

رضاها كل ما أتمنى 

ومهما قلت مش حوفي 

لو حوصف حنانها وقول 

امي حته من الجنه 

................................

أحمد محمود حفني