عيد الحب ( عامية ) /بقلم الاستاذ الشاعر /.أسامة الحكيم –

عيد الحب ( عامية ) 

ما عدش على عيد الحب بقيه

هنقضيه برده السنه دِيّه

في البيت و بنفس الجلبيه

عاوزه أخرج يا راجل

امتع بالدنيا عنيه

خدني وديني المسرح

و اوعى تنسى الهديه

أو حتى نروح الموول 

و نرجع منّه على طول 

يا راجل رد عليّه

أوديكي فين يا وليه

دي الدنيا بتلف بيّه

وولادك مش مخليين

ولا جنيه ليه

طب قعدني ف نادي 

و سمعني كلام ع الهادي

كله حب و حنيه

مالك يا راجل 

أيه البلوه ديه

هو كلامي مش عجبك

طب اعمل زي صاحبك

خد ولاده و الوليه

و راحوا على طول شرم

أيوه هي دي القضية 

نبص دايما للناس

و نفقد حتى الإحساس 

و تقعدي تزني عليه

راح صاحبي شرم

و مبطلش هناك بَرم

و كتر بينهم الخناق

و مراته طلبت الطلاق

يا مصيبتي يا لهوتي

بتكلم يا راجل بجد

دا طلع نتن يتهد

دي مراته الست عليه

منتهى الجمال و الحيويه

يسيبها أبو عينين زايغه

و يجري ورا نسوان مايعه

طب يا أغلى من عنيه

نتمشى ع النيل شويه

ناكل دره و ترمس

أقوم بقه ألبس

أهو نغير حياتنا اليوميه

دا وجودك في حياتي

أغلى من كل الكنوز 

يا جوزي يا أحن جوز 

انت أحلى من اللوز

قوم بقه و متضربش بوز

عمري ما شفت منك أسيه

و انت الهنا يا مراتي

بحبك لحد مماتي

انت الحب و الهوى 

ودايما لوجعي الدوا

تعالي يا حبي نتمشى 

و بعد ما نرجع نتعشى 

و  اغنيلك أحلى أغنيه

بقلم // أسامة الحكيم – مصر