بر السلامة (( 135 )) ... للشاعر الغنائي صبري رسلان

بر السلامه ( 135)
.....................
مهما الحياة إتصعبت
وقفلت بيبانها وقررت
تيجي علينا ..
بنطاطي ليها ما تستحي
شايفه دموعنا بتشتكي
ولا حاسه بينا ...
ماشيتنا عكس
ما فيش يمين
وشيطانها يحلف ١٠٠ يمين
إنه معانا ...
في طابورها واقفين من سنين
طلع الصغير عالكبير
داست على بين البنين
دفنت باقيتنا محرومين
حتى فى جنازة ..
لا شوفنا مره إتأثرت
علت جدارها وكترت
في قلوب ديابه ..
خبت في نارها وولعت
وحطت بخورها وبخرت
باركت شيطانها وباينت
قد أيه غلابه ...
لا دعانا نافع تستقيم
ولا فرحه سرت بيت حزين
عصيت نزول حتى الجنين
كاره لقانا ..
لا ناجينا مرة من الأذى
واليأس عشش كام سنه
وغرقنا في دموع ليل ضنى
يلا السلامه ...
شاربين مرارها للكيعان
وإن فوقنا تحلف خد كمان
كاس من الندامه ..
لا فى حلم نهرب من اللي كان
وعيونا تسأل ايه ده كان
عايشين وشاهدين من زمان
ولا شوفنا حاجه ...
برواز نجاحنا عالحيطان
وفشلنا خيم ليل نهار
غيم سمانا ...
بين لحظه نصحى عالأمل
والحلم شوفناه وإكتمل
طبب قلوبنا من الألم
مع فجر جانا ...
جواك في حاجه بتندهك
صلي وأسجد وإجتهد
وقل هو الله أحد
طوق فيه نجانا ...
مع كل ضيقه يجيك فرج
والعتمه ضايت وإنفرج
درب الغلابه ...
مهما الحياة إتصعبت
بقلم .. صبري رسلان