يوم فرحي/بقلم الاستاذ/صبري حسين

( يوم فرحي) كلمات /صبري حسين 

الكل يوم فرحي

بيرقص ويغني

صحباتي حولي

اللي بتزوقني

واللي يتعدل لي الطرحة

الكل طاير من الفرحة

ساعتها افكار كتيرة

جات على بالي

موش عارفة مالي

ايه اللي جراري

اخيرا  اتحقق حلمي

هاكون لحبيب قلبي

مع كل الفرحة حاسة بحاجة نقصاني

كان نفسي بابا يكون جنبي

يفرح ويرقص يوم فرحي

ساعتها دموعي غلبتني

جريت على اوضي

قعد لوحدي على سريري

سرحت تاني بخيالي

شريط حياتي بيجري قصاد عيني

افتكرت ايام طفولتي

لما  كنت دايما على بابا اجري

كنت برتاح في قربه

كل الامان الاقيه في حضنه

دايما كان يطبطب علي

يقول لي انت اغلي ماعندي

انت قطعة مني

دايما كان واقف جنبي

عمره ما تخلي عني

دايما كان يقول لي

نفسي اشوفك عروسة

قاعدة  مزينة الكوشة

يومها الدنيا موش هتسعني

احس اني أديت رسالتي

يا بنتي يا فرحة عمري

سارحة بخيالي

دموع عيني بتجري

دخلت على امي

مالك تبكي ليه يابنتي

النهاردة يوم سعدك وسعدي

بابا وحشني يا امي

كان نفسي يكون واقف جنبي

يحضر يوم فرحي

ماما ب ايديها مسحت دموعي

تعالي يا نبض قلبي

تعالي لحضني

صدقيني يا بنتي

ابوكي فرحان في مكانه

بيفرح لما تكوني فرحانه

روحه موجودة  معانا

نفسه في كل ركن في بيتنا

يا حبيبتي يا روح قلبي

تعالي اعدلك فستانك

اضحكي من جوة قلبك

عيشي يا حبيبتي ايامك

المستقبل كله قصادك

ربنا يسعدك يابنتي

مع عريسك افرحي واتهني

مبروك ياعروسة

يا وردة من العين محروسة

صبري حسين