مولد الأنتخابات/بقلم الاستاذ الشاعر/الامير_محمود

مولد الأنتخابات

     ...........

مقام سيدك الحصانة والنفوذ 

فى مولد الأنتخابات 

بيقدموا القرابين والتبريكات 

حشيش وبيرة وناس كتيرة متنفعين

كدابين زفه جتلهم هافه بيلفافونا كام لفه علشان يتوهونا أكتر ماحنا تايهين 

شوية دراويش على حبة قلاديش

المخبر والشويش بلطجيه وفتوات 

وكام مليون بقشيش للجنة الأنتخابات 

الشروط والمواصفات يكون جاهل بعزيمه ومايكونش من الناس الفهيمه والموافقة تكون معاه مستديمه ليعارض ويزعل 

البهوات 

ماهو مش فاهم سياسه واقتصاد 

لكن جاى بغلاسه يناكف فى العباد

عينه على الحصانة اللى هتفتح له كل الأبواب 

النهب والسلب ويعوم ف بحر الفساد 

مين ح يحاسب مين ماالكل ملطوتين مؤيدين ومعارضين 

بشعارات رنانه ولفتات 

مزايدات ومهاترات 

بكلام ناقص مش مدروس 

ووعود براقه بلباقه ونصوص 

مشتاق برياء بيحضن ويبوس 

بيمنى نفسه بسلاقه 

ويقول من حقه المحروس  

بالفلوس يشترى الأصوات  

منافس بينافس ويدوس 

مغرور متعالى مهوس 

نافش ريشه كالطاووس 

عامل فيها أبو حلموس 

يقول انا ساكن فى فيللا 

ومحدش له عندى ذله 

مش فاكر العله 

لماالفقر كان موجود 

أهو نسى أيام الجله 

والمش أبو دود 

والقميص اللى كان وصله

كمان نسى اصله النمرود 

شعارات شعارات شعارات 

خطب رنانه بزعيق وخلاص 

وعبارات ملهاش أساس 

بيضحكوا بيها على الناس 

زى القيم والأخلاق 

والوفاء والأخلاص 

عامل فيها حاذق 

ويتكلم عن المبادئ 

بيدافع عن المصالح والمنافع 

والعين بتبكى على النافع 

أسألهم عن معانيها 

تلاقيه غرق وغاص 

رافع شعار الحياة الكريمه 

وهو بيدور عن الغنيمة 

بيخدع بيها الناس ابن الليئمه 

مالوش عندنا شافع وقيمة  

أنا لا بمدح ولا بذم 

لكن بقول كلام مهم

يجمع الناس ويلم 

ويكون شامل ويهم الناس الفهيمه

سيادة النائب العاصى التائب 

ومصدر كل الأزمات

ماتشوفش خلقته غير فى المناسبات 

أو بعض القنوات

بذكركم بالحاضر واللى فات 

واللى بيحصل فى مولد الأنتخابات

........

بقلم.الشاعر 

الأمير _محمود